ԱրմՊերիօ 2026

Պերիօդոնտոլոգիան /պարօդոնտոլոգիա/ ստոմատոլոգիայի արագ զարգացող ճյուղերից է: Ուսումնասիրում է ատամների և իմպլանտների շուրջ փափուկ և կարծր հյուսվածքների առողջ վիճակն ու ախտաբանությունը: Այժմ, հաշվի առնելով ատամների՝ իմպլանտներով փոխարինելու համաշխարհային տեմպերը, էլ ավելի է կարևորվում պերիօդոնտոլոգիայի լիարժեք ուսումնասիրումը՝ բնական ատամները հնարավորինս պահպանելու և հետագա բարդություններից խուսափելու համար: Ինչպես նաև իմպլանտների երկարակեցության համար էական է լնդի բավարար ծավալի վերականգնումը, որը ևս իրականացվում է Պերիօդոնտոլոգիայի արդի ուղեցույցների շնորհիվ:

«Արմ․Պերիօ․2026» Հայաստանի պերիօդոնտոլոգների Ասոցիացիայի տարեկան գլխավոր գիտական միջոցառումն է, որի ընթացքում ներկայացվող նյութը հիմնված է համաշխարհային ապացուցողական գրականության, հեղինակավոր գիտական ամսագրերում տպագրված հոդվածների, կլինիկական հետազոտությունների, ինչպես նաև դասախոսների բազմամյա կլինիկական փորձի վրա:

2026 թ.-ի գիտաժողովը պատիվ ունի հյուընկալելու համաշխարհային ճանաչում վայելող մասնագետների, ովքեր կիսվելու են իրենց կլինիկական փորձով և կատարելու են կարևոր շեշտադրումներ՝ բժիշկ-ստոմատոլոգների կլինիկական աշխատանքը հաջորդիվ բարելավելու ուղղությամբ:

ԱրմՊերիօ.2026ի ընթացքում քննարկվող թեմաները ընդգրկում են խոր ոսկրային դեֆեկտների դեպքում պերիօդոնտոլոգիայում ռեգեներացիոն եղանակների բացահայտումը, իմպլանտացիայի դեպքում guide-երի ընտրության նրբությունները, ինչպես նաև իմպլանտների շուրջ փափուկ հյուսվածքների ավելացման կարևորության մասին:

Գիտաժողովը մեծ հնարավորություն է ընձեռում շփվելու համաշխարհային փորձի հետ, ծանոթանալու պերիօդոնտոլոգիական տարբեր խնդիրների գիտահեն կլինիկական լուծումներին, ինչպես նաև ընդլայնելու մասնագիտական մտահորիզոնը:

Այս գիտելիքների հիման վրա էլ հետագայում կառուցվելու է տարբեր կլինիկական իրավիճակներում ճիշտ մոտեցում ցուցաբերելու հմտությունը: